Arkadag şäherinde 29-njy martda Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň döredilmeginiň 5 ýyllygy mynasybetli dabaraly çäreler geçirildi. Bu çäreler şäheriň baýramçylyk meýdançasynda ýaýbaňlandyryldy.
Dabarada, ilki bilen, hormatly Prezidentimiz Serdar Berdimuhamedowyň bu ýerde guralýan medeni çärelere gatnaşyjylara iberen Gutlagy okaldy.
Çäräniň barşynda halkara guramalaryň ýurdumyzdaky wekilhanalarynyň käbir ýolbaşçylaryny Türkmenistanyň “Arkadag” medaly bilen sylaglamak hakynda hormatly Prezidentimiziň gol çeken Permany okaldy. Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça wise-prezidenti Oguljahan Atabaýewa Birleşen Milletler Guramasynyň Ösüş maksatnamasynyň Türkmenistandaky hemişelik wekili Narine Saakýany we Birleşen Milletler Guramasynyň Çagalar gaznasynyň (ÝUNISEF) Türkmenistandaky wekili Jalpa Ratnany mynasyp bolan sylaglary bilen gutlap, dabaraly ýagdaýda olara “Arkadag” medalyny gowşurdy.
Soňra dabara gutlag çykyşlary bilen dowam etdi.
Ýurdumyzyň medeniýet we sungat ussatlarynyň belent ruha beslenen çykyşlary Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň döredilmeginiň 5 ýyllygy mynasybetli guralan dabara aýratyn öwüşgin çaýdy. Konsertde teatr artistleriniň we Şükür bagşy adyndaky Arkadag şäher çagalar sungat mekdebiniň, çagalar tans toparlarynyň bilelikde ýerine ýetiren aýdym-sazly edebi kompozisiýasy täsirli pursatlara baý boldy. Aýdym-sazly çykyşlar dabaranyň many-mazmun taýdan has-da baýlaşmagyny şertlendirdi. Baýramçylyk konsertiniň dowamynda milli aýdym-sazlar bilen birlikde, daşary ýurtlaryň dünýä belli eserleriniň hem ýaňlanmagy has täsirli boldy.
Dabara gatnaşyjylar hormatly Prezidentimiziň adyna Ýüzlenme kabul etdiler.
Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy Gahryman Arkadagymyzyň 2021-nji ýylyň 29-njy martynda gol çeken Kararyna laýyklykda döredildi. Şondan bäri gaznanyň serişdeleriniň hasabyna tutuş ýurdumyz boýunça näsag çagalaryň 758-sine operasiýalar geçirildi. Gurbanguly Berdimuhamedow adyndaky çagalar sagaldyş-dikeldiş merkezinde şu güne çenli 2 müň 467 çaga döwrebap sagaldyş-dikeldiş bejergisini aldy.
Çeşme: Türkmenistanyň Döwlet habarlar agentligi
