Türkmenistanyň Prezidenti Serdar Berdimuhamedow ýurduň oba hojalyk pudagyny has-da ösdürmek, azyk bolçulygyny üpjün etmek we galla önümçiliginde gazanylan üstünlikleri berkitmek maksady bilen Türkmenistanda 2027-nji ýylda bugdaýyň bol hasylyny öndürmek hakynda Karara gol çekdi. Bu barada Türkmenistanyň Döwlet habarlar agentligi habar berdi.

Berkarar döwletiň täze eýýamynyň Galkynyşy döwründe bugdaý öndürilişiniň möçberlerini yzygiderli artdyrmak döwlet syýasatynyň ileri tutulýan ugurlarynyň biri bolup durýar. Şeýle hem bu resminama daýhan birleşikleriniň, kärendeçileriň we ýer eýeleriniň has öndürijilikli hem-de netijeli zähmet çekmekleri üçin ähli zerur şertleri we amatly gurşawy döretmäge gönükdirilendir.

Täze kabul edilen taryhy resminama laýyklykda, «Türkmengallaönümleri» döwlet birleşigine ýerleriň kärendeçileri, peýdalanyjylary we ýer eýeleri bilen özara bähbitli şertnamalary baglaşmak tabşyryldy. Bu uly göwrümli işler welaýatlaryň häkimlikleri bilen bilelikde utgaşykly görnüşde amala aşyrylar. Guramalar 2027-nji ýylyň hasyly üçin ýurdumyz boýunça ýörite bellenen meýdanlara bugdaýyň ýokary hilli tohumlaryny öz wagtynda ekip, şertnamalaýyn borçnamalara laýyklykda degişli möçberde galla hasylynyň alynmagyny doly üpjün etmelidirler.

Prezidentiň bu Karary däneçi daýhanlaryň zähmetine bolan höwesini artdyrmak bilen, ýurduň agrar pudagyny döwrebaplaşdyrmaga we oba hojalyk önümleriniň mukdaryny durnukly köpeltmäge kuwwatly itergi berer. Resminamada göz öňünde tutulan wezipeleriň üstünlikli durmuşa geçirilmegi Türkmenistanyň ykdysady garaşsyzlygyny barha pugtalandyrmaga hem-de ilatymyzyň galla önümlerine bolan isleglerini ýokary hilli ýerli önümler bilen doly kanagatlandyrmaga ýardam eder.